Það er ekki hraðinn sem skiptir máli heldur átakið eða vinnan sem þú innir af hendi. Þetta er útskýrt lauslega í greininni sem ég benti á í síðasta svari. Takmarkið er að nálgast hámarkspúls þegar þú ert að reyna á þig, þú getur erfiðað meira á hlaupabretti með því að auka hraðan eða með því að auka hallann á brettinu (öll nýrri bretti sem ég hef séð hafa hallastýringu). Það sama gildir um á þrekhjóli, þú getur aukið þyngdina eða farið hraðar. Þú ættir einfaldlega að geta fylgt tilfinningu, ef þú prufar að fara í eitt svona prógramm og fannst að þú hefðir getað gert mikið meira þá einfaldlega skokkar þú í meiri halla næst eða eykur hraðan. Oftast eru stigstilling (level), þú gætir til dæmis prufað að fara í áttunda stig, ef það er of létt þá einfaldlega ferðu ofar o.s.frv.

Þú getur líka ef þú vilt vandað til verka ef þú átt púlsmæli (getur vitaskuld tekið púlsin sjálfur, en það er sjaldan eins nákvæmt og mælarnir sem eru á svona tækjum eru oft mjög ruglaðir að minni reynslu), þá finnur þú hámarkspúlsinn með því að hita aðeins upp, spretta nokkrum sinnum með rólegu rölti á milli, svo í endann tekur þú bara á eins og þú getur (ef þú ert að reyna nægilega á þig getur þú ekki haldið slíku átaki mikið lengur en 2 mín.). Það er líka til reikniaðferð fyrir þetta, þá draga menn vanalega aldur sinn frá tölunni 220 (það eru til einhver afbrigði af þessu). Hámmarkspúls 20 ára einstaklings ætti að vera um 200 en það fer vitaskuld eftir formi o.s.frv. Þegar þú ert svo að taka á í HIIT æfingu miðar þú við 90% af hámarks púls, sem gæti verið um 180 slög á mín. til dæmis.

Það eru líka margir aðrir kostir við að eiga púlsmæli, til dæmis er einn besti mælikvarði á gott form hversu fljótur þú ert að ná þér niður eftir átak og svo lækkar hvíldarpúlsinn vanalega. Hjá heilbrigðum einstakling sem stundar ekki mikið íþróttir er hvíldarpúls vanalega á bilinu 60-80 slög á mín. en þeir sem eru í góðu formi eru gjarnan á á bilinu 40-60.