Vargur
Roleplay (RPG), eða Spunaspil einsog orðið hefur hvað best verið íslenskað, lýsir ákveðinni tegund ævintýraleikja sem vinsælir hafa verið í grasrótinni í um 3 áratugi. Þekktasta spunaspilið er sennilega gamla Dungeons & Dragons sem gegnum tíðina hefur fengið misgóða útreið í fjölmiðlum. Þó spil þessi notist við eitthvað af hefðbundnum búnaði borðspila (s.s. teninga) eru þau gjörólík öðrum spilum og í algjörum sérflokki. Í spunaspilum taka leikmenn sér hlutverk einnar söguhetju í ímynduðum heimi og vinna saman að því að leysa ýmis vandamál, ólíkt venjulegum borðspilum þar sem leikmenn etja kappi hver við annan. Spunaspil eru sennilega álíka vinsæl á Íslandi og hinum vesturlöndunum og eru sennilegast af einhverju magni leikin af hátt upp undir þúsund manns á Íslandi. Spilin eru leikin af hópum leikmanna frá 10 ára aldri og uppúr þó algengasti hópurinn sé sennilega á bilinu 15-30 ára.

Til gamans má geta að spunaspil eru það sem í upphafi hrinti af stað þeirri tegund tölvuleikja sem kallast hlutverkatölvuleikir (CRPG). Dæmi um slíka leiki eru: Eye of the Beholder, Ultima, Might and Magic, Fallout, og svo mætti lengi telja. Þessir leikir eru í raun tölvu-útgáfan af spunaspilum þó menn hafi lengi deilt um hvort tengja ætti þetta tvennt beint saman þar sem mannlegi þátturinn sem er svo mikilvægur í spunaspilum tapast eðlilega þegar í tölvuna er komið.