Eins og kannski hefur þegar komið í ljós þá verða BJJ æfingar á þriðjudögum klukkan 21:00 og á laugardögum klukkan 15:00 í Aikido salnum í Faxafeni. Þetta verður svona til að byrja með, á meðan við erum að þreifa fyrir okkur með þetta.

Æfingin á laugardaginn gekk vel. Ég og Kári fórum yfir brögð í guard og sidemount stöðunni. Við fórum í það að halda stöðunum, sleppa úr þeim og submissions frá þeim.

Ég fattaði það hins vegar eftir á að við vorum að fara of mikið út í tæknileg smáatriði bragðanna sem væri best að fara í fyrir meira advanced nemendur og tekið fyrir af meira advance BJJ kennurum en okkur. Setup og combinations ættu í raun ekki að koma fyrr en við höfum náð betra valdi á basic brögðunum, sem dæmi. Slíkt lærist líka ágætlega úr frjálsri glímu (sparring). Úr þessu verður bætt á næstu æfingu, þannig að ég sé fram á betri æfingu þá en á laugardaginn. Þetta var þó gaman.

Fyrir þá sem eru að lesa þetta í fyrsta skipti þá er BJJ (Brasilískt Jiu Jitsu) svona ein af aðal undirstöðu bardagalistum svokallaðra Mixed Martial Arts eða Freefight og það má sjá þetta mikið í keppnum eins og Ultimate Fighting Championships (UFC) og Pride, hjá þeim keppendum sem berjast helst í gólfinu.

BJJ er mest megnis gólfglíma með lásum, hengingum og vörnum gegn höggum. Það er enginn hérlendis sem hefur kennararéttindi í BJJ, því miður, en Kári hefur lært þetta í þrjá mánuði af kappi úti og ég hef stundað Japanskt Jiu Jitsu í 1 ár og Júdó í nokkra mánuði fyrir 2 árum síðan. Ég á nokkuð mikið af kennsluefni í þessu á bókum og vídeóspólum sem ég hef verið að prufa á aumingja bróður mínum áður en ég hafði samband fyrir stuttu við Salvar og Kára til að koma af stað BJJ skóla í Reykjavík.

Markmiðið er að æfa þetta saman og læra þetta saman, fá til okkar BJJ kennara erlendis frá til að halda seminar hér og vonast til að einhverjir okkar gætu fengið alminnilegt kennararéttindi. Þó að okkur skorti reynda kennara þá er það skoðun topp manna í BJJ eins og Roy Harris og Mario Sperry að það sé hægt að læra þetta vel eins og við erum að gera það. Ég vil taka það fram að það er mjög mikill áhugi fyrir hendi og að við erum að fara að gera þetta af alvöru; þetta er ekkert djók sem verður síðan búið.

Ég hef mikla trú á því að fólk sem verður hjá okkur í 6-12 mánuði eigi eftir að sjá mikið stökk í færni sinni í gólfbardögum. Og það hefur sýnt sig milljón sinnum í UFC, MMA og Freefights að ef þú hefur ekki a.m.k. undirstöðu í gólftækni þá endistu ekki lengi í slíkum bardögum.

Vonandi sjá sem flestir sér kost á að mæta á þriðjudaginn!