The Assassination of Jesse James by the Coward Robert Í einni af mögnuðustu myndum nýliðins árs fylgjumst við með því þegar Robert Ford kemst í kynni við átrúnaðargoð sitt Jesse James. Eftir að eldri bróðir Roberts verður hluti af alræmdu gengi Jesse James er yngri Ford bróðirinn staðráðinn í því að sannfæra glæpamanninn um að hleypa sér inn líka. Hann fær að fljóta með þegar gengið rænir lest og kemst að því að raunveruleikinn er fjarri þeim dýrðarljóma er hann hafði ímyndað sér í æsku. Með tíð og tíma verður hann gramur út í Jesse og hryna atburða leiðir til morðsins sem titillinn vísar til. Jesse James er heldur ekki vel á sig kominn andlega. Hann er plagaður af vænissýki eftir öll árin sem hann hefur lifað sem glæpamaður í sjálfskipaðri einangrun og útlegð. Andlegt ástand hans verður til þess að Robert fer að missa álitið á átrúnaðargoði sínu og kemst upp á kant við hann á endanum.