Hver er hann þessi Zarqawi sem maður er stöðugt að heyra um í fjölmiðlum? Varla sprengir sá maður sig í loft upp í Írak eða nágrannalöndum að honum sé ekki kennt um það. Hann er sagður foringi djihadista í Írak, æðsti maður al-Kaída svæðisdeildarinnar þar. Til eru tvær myndir af honum, á annarri er hann kornungur, brúnaþungur og illmannlegur, á hinni er hann miðaldra, feitlaginn og brosmildur. Eitt sinn sögðu blöðin hann vera eineygðan eftir misheppnað sprengjutilræði, í annað sitt (2002) var sagt að hann hefði misst annan fótinn og hökti við staf. Núna hefur komið í ljós að hann hefur sjón á báðum og fóturinn virðist hafa vaxið á hann aftur, allavega kemur helti ekki í veg fyrir að hann sleppi undan árásum Bandaríkjaher næstum því daglega. Hann er drepinn með reglulegu millibili en snýr alltaf við aftur eins og ofurhetja úr Hollywood-kvikmynd Þetta er lóner, dularfullur náungi og afar mótsagnakenndur. En er hann yfirleitt til? Um það fjallar þessi hugleiðing.

Síðast þegar hann var drepinn við sýrlensku landamærin leituðu sérfræðingar Bandaríkjahers að DNA til að ganga úr skugga um að þetta væri virkilega Zarqawi. En vandamálið er að jafnvel þótt þeir hefðu líkið af honum handbært gætu þeir ekki sannað neitt því þeir hafa ekkert erfðaefni að bera saman við. Menn sem eru sagðir hægri hönd Zarqawis eru líka teknir með reglulegu millibili en síðan kemur yfirleitt í ljós að þeir eru sá sjötti eða tíundi eða fimmtándi í því volduga híerarkíi þar sem Zarqawi trónar á toppnum.

Zarqawi er nokkurskonar dr. Goldfinger Íraks, þaulskipulagður, snilligáfaður, illur og miskunnarlaus fram í fingurgóma, allstaðar og hvergi í senn. Við vitum nánast ekkert um hann nema að hann er höfuðpaurinn, þessi með hettuna yfir hausnum sagandi hausa af varnarlausum gíslum eða sprengjandi upp konur og börn og gamalmenni. Um leið er hann framúrskarandi PR-maður, framleiðir myndbönd og hljóðbönd fyrir fjölmiðla, skipuleggur uppreisnir í öllum helstu borgum Íraks, rænir útlendingum í gríð og erg, hringir í al-jazeera og arabísku blöðin um leið og eitthvert ódæði er framið til að taka á sig ábyrgð eða firra sig ábyrgð.

Furðulegur og óhuganlegur náungi, 37 ára gamall. Hvaðan skyldi hann fá peninga og vopn? Hvaðan berst honum allur þessi liðsafli til að sprengja sig í loft upp - frá Sýrlandi, Jórdaníu, Íran, Jemen og jafnvel alla leið til Evrópu. Eða er Zarqawi kannski bara enn ein lygasagan sem CIA og pyndingameistarar Bandaríkjahers hafa skapað til að fá bláeygðan amerískan almenning sem nú stundar þakkargjörð með kalkúnaáti til að fókusera á eitt tilbúið útlenskt illmenni í staðinn fyrir hin mörgu raunverulegu innlendu?

flest allt frá Al-jazeera er einfaldlega rangur áróður.