Vissulega er tilgangur vörunnar mismunandi, en það breytir því ekki að ríkið hefur ekki rétt til að skipa þér fyrir um það hvort þú notar þær eða ekki eða hvernig þú notar þær ef þú gerir það. Valfrelsi einstaklinga hlýtur alltaf að verða að hafa forgang, svo lengi sem hann skaðar ekki aðra. Það er ansi langsótt að segja að heróínneysla skaði líkamlega nokkurn annan en þann sem þess neytir.

Ef þú vilt hella yfir þig bensíni og kveikja svo í sígarettu hefurðu fullan rétt til þess, það er heimskulegt og skaðlegt, en þú hefur engu að síður fullan rétt á því að gera heimskulega hluti sem eru skaðleg þér.

Og já, þegar kemur að valfrelsi einstaklinga, er lítið um grá svæði. Annað hvort hefurðu valfrelsi, eða ekki.

Hins vegar vil ég benda þér á að í lýsingunni hjá þér á vörunum tveim, þá gleymdirðu að taka fram hver notkun fíkniefna er. Hún er nefnilega ekki bara seinvirkt sjálfsmorð. Fólk er að leita að vímu. Áfengi er ein leið til þess, jafnvel sígarettur flokkast þar undir þar sem nægileg breyting verður á líðan einstaklings við neysluna. Sama má segja um heróín, kókaín, maríjúana, e-töflur, LSD, hvað þetta nú allt heitir, sem eru allt leiðir einstaklings til að komast í vímu. Sumir sniffa lím. Það er ein leið. Sumir borða sveppi eða reykja njóla. Sumir nota lyf sem þarf lyfseðil til að fá. Sumir ánetjast verkjalyfjum. Sumir setja bara plastpoka yfir höfuðið til að minnka súrefnisinntökuna. Sumir anda að sér hláturgasi.

Það er til fullt af aðferðum til að komast í vímu eða annarlegt ástand, sem er jú tilgangurinn með þessu öllu saman.

Hvernig í ósköpunum getur það verið í verkahring ríkisins að segja fólki til um það hvaða aðferðum það má beita?

Í samfélagi gilda reglur, já.
Lítum aðeins á það hvaða tilgangi reglurnar þjóna:

A) Til að tryggja öryggi einstaklinga.
B) Til að tryggja frelsi einstaklinga.
C) Til að tryggja að athafnir frjálsra einstaklinga skerði ekki rétt annarra einstaklinga til að njóta A og B.

Þar af leiðandi gefur það auga leið að frumskógarlögmálið gengur ekki, því það brýtur í bága við A.

C tryggir að A hefur forgang yfir B.

Ég sagði það nú áður, en kannski rétt að taka það fram aftur, að ég neyti engra fíkniefna og hef aldrei gert, en ég tel það fullan rétt hvers einstaklings að fá að gera það sem honum sýnist svo lengi sem hann er ekki að brjóta á rétti annarra.

Þú hittir hins vegar naglann á höfuðið með það að samfélagið hafi komið sér saman um að reyna að koma í veg fyrir að fólk skaði sig að óþörfu. En þar liggur einmitt hundurinn grafinn.
Hvað með þá sem kæra sig ekki um að samfélagið sé að skipa þeim fyrir verkum heima hjá sér? Er það ekki einmitt hluti af því að vera sjálfráður einstaklingur að þurfa ekki að fara eftir fyrirskipunum annarra misvitra einstaklinga?

Á þessum sömu forsendum er ég ekki bara á móti því að reykingar séu bannaðar, ég er líka á móti því að fólk fari í mál við tóbaksframleiðendur eins og algengt er í BNA. Mér er minnisstætt fyrsta málið sem tóbaksfyrirtækin töpuðu þar sem um var að ræða mann sem byrjaði að reykja EFTIR að framleiðendurnir byrjuðu að setja miða á hvern pakka sem á stendur að “Tóbaksreykur getur valdið krabbameini, lungaþembu, hjartasjúkdómum og öðrum kvillum.” (eða eitthvað líkt þessu, man ekki orðrétt). Þeim manni voru dæmdar 25 milljónir dollara í skaðabætur! Fyrir að hafa notað vöru sem á var viðvörun um að notkun hennar væri honum skaðleg! Hvað þarf eiginlega að gera til að fólk taki ábyrgð á eigin gjörðum? Stíla þessa miða á fólk með nafni til að það fatti að þetta er skaðlegt?

Jú, það er mikið af skaðlegum efnum, sum eru lögleg, sum ekki. Það er mjög lítið annað en tvískinnungur sem stjórnar því hvaða efni eru lögleg og hver ekki.

Í lýðræðisríkjum er samfélagið ríkið. Samfélagið getur ekki sagt mér hvað ég get eða get ekki gert inni á mínu heimili.
Það bara gengur ekki upp. Ef ég skaða engann með athöfnum mínum, hvernig er þá hægt að banna þær?

Veistu að lögregludeildin í BNA sem tekur á fíkniefnum og vændi kallast Siðgæðislögregla? Er það virkilega hlutverk yfirvalda að fangelsa fólk fyrir að særa siðgæðisvitund þeirra sem stjórna þá stundina? Nei, nei, nei og aftur nei.