Dulspekiáhugamálið eyddi þessari grein út - hún kom víst við
einhvern snöggan blett hjá stjórnendum þar - og Vísindi og
fræði vísuðu henni á bug þar sem hún er víst ekki nógu
vísindaleg (en hún er fræðileg mjög). Munið bara að með réttu
er þetta dulspekigrein.

—

Hér ætla ég að fjalla um hlut sem ég er búinn að sökkva mér
svolítið í undanfarið. Ég trúi þessu sjálfur þar sem ég varð fyrir
sérstakri reynslu til að festa mig í trúnni.

Eðlukríli (e. Dino babies) eru allt í kringum okkur. Þau eru
oftast í einhverjum grænum litatón, en það er þó ekki algilt.
Verndarkríli svokölluð eru til að mynda oft í appelsínugulum
kuflum, og sýna sjaldan sinn rétta skráp. Öll eigum við okkar
eðlukríli sem fylgir okkur og hjálpar okkur eða hrekkir, allt eftir
eðli eðlukrílisins. Til er svokölluð Krílamyndataka sem hægt
er að fara í til að freista þess að sjá krílið sitt, hafi maður ekki
þá gáfu sem þarf til að sjá það berum augum. Þá gáfu er
hægt að rækta með miklum æfingum og iðkun ýmissa
helgisiða, sem ekki er ætlunin að fara nánar út í hér.

Eðlukrílum er það flestum sameiginlegt að þau eru mjög
hrifin af að hrekkja fólk. Fylgjukrílin, sem fylgja okkur eru þó
oftar minna í þessu (þó auðvitað séu undatekningar á því), en
til eru Ærslakríli sem hafa ekki fylgt fyrrum eigendum sínum
yfir móðuna miklu og reika því frjáls um og hrekkja fólk. Oftast
eru þetta saklausir hrekkir, eins og t.d. að stela vinstri sokkum
fólks (eðlukríli eru mjög hrifin af vinstri sokkum, og innrétta
hreiður sín iðulega með þeim) eða fela
sjónvarpsfjarstýringuna. Öll höfum við líklega lent í þessu, og
sannar það óyggjandi tilvist eðlukrílanna að mínu mati.

Stundum vöknum við af svefni og finnst við vera lömuð. Margir
halda að þetta stafi af einhvers konar sálarflakki, eða jafnvel
einhverju enn fáránlegra eins og t.d. vísindalega sönnuðum
svefnvenjum fólks. Í raun og veru mun samt vera hér um að
ræða slagsmál milli Fylgjukrílisins okkar og Ærslakrílis sem
vill líklega toga nærbuxurnar upp um okkur eða gera einhvern
annan óskunda af sér. Við þessi læti vöknum við oft, og finnst
eins og þungi hvíli á brjósti okkar (sem er skiljanlegt, þar sem
eðlukríli geta orðið ansi búlduvaxin).

Ég vona að þessi stutta grein fræði ykkur eitthvað örlítið um
eðlukrílin í krignum okkur, og hvetji ykkur jafnvel til að leita
meiri upplýsinga. Ef þið viljið vita meira vill svo skemmtilega til
að ég sel ýmsar ritgerðir mínar um málið gegn vægu gjaldi. Af
þeim ber helst að nefna:

* Eðlukrílið þitt - 101 aðferð til að kynnast því
* Allt um Ærslakríli (Nú með viðauka frá 2002 um nýuppgötvuð
ill ærslakríli)
* Helgisiðir Eðlukrílisma útskýrðir (lauslega byggt á riti dr.
Gordon Sumners: Dino Babism - The Rituals Explained. Þýtt
og staðfært)
* Eðlukrílismi (íslensk þýðing af metsöluritinu Dino Babism
for Dummies)

Krílakveðja,

rotta