allt sem ég heyri um versló er jákvætt og allt um mh neikvætt núorðið, ehehe

Þetta eru alveg voðalega ólíkir skólar. Félagslífið í MH er nokkuð gott ef maður sýnir einhvern smálit, en ég veit svosem ekkert um félagslífið í Verzló. Ég gæti sagt þér að velja Verzló ef þú telur þig fitta þar inn (þó það sé voðalega erfitt að eignast ekki vini í bekkjarkerfi), betur en þú myndir fitta í MH, þó þú eigir líklega fullt af vinum sem munu fara í MH fyrst þú telur það skipta einhverju máli að “búa nær MH”, þarsem það er svona 5 mínútna ganga á milli ef maður er á tjillinu.

Skoðaðu hinsvegar vel hvernig nám þú vilt fara í. Í MH er mjög auðvelt að aðlaga námið að sínum þörfum, enda áfangakerfi þar og þú stjórnar náminu mjög vel og ræður fullkomlega hvenær þú tekur áfanga, nákvæmlega hvaða val- og kjörsviðsáfanga þú vilt taka og fleira. Í Verzló er bekkjarkerfi þarsem námið er alltaf uppað vissu marki mótað fyrir þig, líkt og þú kannast líklega við úr grunnskóla.

Í MH er ekki lögð áhersla á neitt sérstakt fyrir alla nemendur og afar fjölbreytt nám í boði, þó það megi eflaust finna ýmislegt í öðrum skólum sem ekki er að finna í MH. Í Verzlunarskólanum hinsvegar, einsog nafnið bendir til, er lögð mikil áhersla á verslun. Félagsfræðibraut í Verzló, sem dæmi, leyfir þér ekki að velja hvaða kjörsvið þú vilt, hvort þú viljir t.d. leggja áherslu á íslensku og sögu, heimspeki og sálfræði eða hvað þú vilt. Þar er aðeins eitt kjörsvið í boði, sem er alþjóðakjörsvið. Einsog segir á heimasíðu skólans: “Markmið námsins er að veita nemendum góðan grunn í sögu og menningu helstu viðskiptalanda okkar.”

Skoðaðu heimasíður skólanna vel og reyndu að finna út hvaða nám hentar þér, eða hið minnsta hvaða nám hentar þér ekki. Ef þú hefur t.a.m. engan áhuga á þeirri verslun sem Verzló leggur mikla áherslu á þá er mikið sniðugra fyrir þig að fara í MH, þó þú sért kannski pínu “tjokkó”.

http://www.mh.is/?d=4&m=page&f=viewPage&id=158 og www.verslo.is

Á Verzló-síðunni eru nokkrir flipar á forsíðunni undir “námsframboð” sem þú getur skoðað. Á MH-síðunni er svo líklegast að þú viljir ýta á efsta linkinn.

Er sammála þeim sem svaraði þér að ofan, en ég vil þó bæta við þessu:
Hafðu það í huga að þú þarft helst að vera með nánast skotheldar einkunnir ef þú vilt komast í framhaldsskóla sem ekki telst þinn heimaskóli, þar sem að öllum almennum framhaldsskólum ber frá og með haustinu í haust að taka inn lágmark 45% nemenda úr sínum “hverfisgrunnskólum”, og þá þrengir mjög mikið að hinum 55% í einkunnakröfum.

Hvað sem þú gerir, ekki ákveða þetta eftir því hvernig þú klæðir þig eða því sem þú “heyrir”. Farðu frekar í kynningar skólanna beggja, fáðu að heyra um hvernig náminu er hagað í hvorum skóla og myndaðu þér skoðun á því hvort bekkjarkerfi eða einingakerfi hentar þér betur því þegar upp er staðið er það eitthvað sem fólki virðist alls ekki sama um og er það oft að skipta um skóla seinna meir bara til þess að fara í “hitt kerfið”.

Það sem þú “heyrir” er ekkert alltaf rétt. Persónulega hef ég heyrt af lakara félagslífi í Verzló undanfarin ár - síðra en það var. Leikritin eru ekki eins vinsæl og áður og ekkert betri nú á dögum en í öðrum skólum, að ég held. Þá að undanskildu því aukaatriði að þau eru oft með þekkta leikstjóra þar sem þau eru í einkareknum skóla sem á ef til vill meiri pening til að eyða í slíkt. Auk þess hef ég heyrt að oft sé hætt við böll í Verzló því það eru bara hópbeil á böllinn og engin stemning fyrir þeim - í staðinn mæta verzlingarnir á böll í MR.

Myndaðu þér sjálf/ur skoðun út frá skynsamlegum ályktunum.
Í MH er t.d. góð félagsfræðideild og sem einingaskóli er hann sennilega fremstur á sínu sviði - þá í öllum greinum. Ég hef heyrt minna um raungreina- og tungumáladeildir en þær eru örugglega jafngóðar og annað. Þú getur tekið þær einingar sem þú vilt, margar brautir koma til greina og mér skilst að það sé mikið um að skila ritgerðum sem spila mikið inn í lokaeinkunn. Það er t.d. ekki í mínum skóla, meiri áhersla lögð á próf og skyndipróf, þó mér finnist þetta ritgerðadæmi algjör snilld. Að sama skapi er það tímafrekt og ekki við hæfi allra. Í einingakerfið geturðu búist við að vera oft í eyðum sem þú verður að ákveða sjálf/ur hvort þér finnst það betra eða verra…
Í Verzló er - eins og nafnið gefur til kynna - náttúrlega fyrst og fremst verið að miða að því að koma fólki út í viðskiptalífið. Þau eru án efa fremst á sínu sviði í greinum eins og hagfræði, bókfærslu, viðskiptafræði og öllu því sem kemur þeirri grein við - enda verslunarskóli. Hef líka heyrt góða hluti um raungreinakennsluna, þau státa sig líka af því að vera útbúin nýjum tækjum til verklegrar menntunar - þó ég sé ekki alveg viss um hversu miklu máli það skiptir. Í Verzló er t.d. bekkjarkerfi, sem þýðir að þú yrðir alltaf með sama fólkinu í bekk í öllum tímum og sennilega minna um eyður - bekkjarskólar eru skipulagðir þannig að þeir hafi færri brautir sem koma til greina en stundatöflur nemenda eru látnar passa þannig að þeir eru samfellt í skólanum frá kannski 9-15, ég veit það ekki alveg, og þá lítið af eyðum inn á milli.

Hvað varðar félagslíf og jafnvel kennslu og kennara færðu örugglega einhver svör frá þeim sem virkilega eru í þessum skólum. Ég er bara að tala um málið almennt, enda í öðrum skóla. Afsakaðu langlokuna.

Tommi Kung-Fu var í MH. Er það ekki næg ástæða?

Ég var í VÍ og skipti yfir í MH og líkar það mun betur þar. Það er aðallega vegna þess að ég var kominn með ógeð á þessu bekkjarkerfi og tókst einhvern veginn að kynnast MH-ingum á meðan ég var í VÍ. Annars hvað námsval varðar, þá held ég að það hafi komið flest fram fyrir ofan.