Áttar fólk sig ekki á því að Engjaskóli, fyrirhugaður unglingaskóli, er rétt hjá Borgarholtsskóla sem er framhaldsskólinn í hverfinu. Sölumenn eiturlyfja og annarra vímuefna munu fagna því að geta náð til allra unglinga í norðanverðum Grafarvogi á einum stað!

Leyfum börnunum að vera áfram börn þrátt fyrir að þau séu komin í 8.-10. bekk. Það verður næg félagsleg pressa hvað vímuefni varðar þegar komið er á framhaldsskólaaldurinn eftir 10. bekk eins og flestir foreldrar þekkja af eigin raun.

Eins eru undirgöng með tilheyrandi veggjakorti og sóðaskap undantekningarlaust fráhrindandi og margir veigra sér við að fara um slík göng, jafnt fullorðnir sem börn. Undirgöng bjóða auk þess upp á óæskilega hópamyndun og er skjól fyrir reykingar, drykkju, einelti o.fl. er ekki nóg af slíkum í hverfinu nú þegar?

Allflestir nemendur í unglingadeildum skólanna hafa t.a.m. tekið þátt í verkefninu Skrekkur með einum eða öðrum hætti. Hætta er á að færri komist að ef hugmyndin um safnskóla verður að veruleika.

Slík breyting, ef af verður, hlýtur að kalla á breytingu á deiliskipulagi hverfanna. Höfum einnig hugfast að ef unglingastigið okkar fer annað kemur það aldrei aftur! Hér væri verið að festa í sessi varanlegar skipulagsbreytingar fyrir Borgar-, Engja-, Korpu- og Víkurhverfi sem hefðu slæm heildaráhrif og sköpuðu fleiri vandamál en þær myndu leysa.

Getur nokkur sætt sig við að stíga skref afturábak í forvarnarmálum? Er nokkuð mikilvægara í dag en að gera allt sem í okkar valdi stendur til að fyrirbyggja að börnin okkar lendi í neyslu. Það er nógu erfitt að fylgjast með unglingunum okkar eins og staðan er í dag.