þeir komu hingað árið 2000 (minnir mig) og tóku upp smá efni sem rataði á síðustu breiðskífu. sú kom út árið 2001 en síðan þá hefur lítið spurst til þeirra. ef einhver nennir að lesa þetta þá er hér smá grein sem ég skrifaði um M.O.A.M. fyrir nokkrum árum:


Menn hafa löngum velt fyrir sér hvort líf finnist á öðrum hnöttum og fjöldi fólks telur sig meira að segja hafa séð geimverur einhvern tímann á lífsleiðinni. Meðlimir hljómsveitarinnar Man..Or Astro-Man? sjá aftur á móti geimverur í hver sinn þeir líta í spegil því þó þeir líti út eins og ósköp venjulegir jarðarbúar er það í raun aðeins blekking til að geta fallið inn í fjöldann. Þeir dulbúa sig því sem brimrokkband á meðan þeir leita að varahlutum í geimskipið sitt sem hrapaði til jarðar árið 1992 með þá Birdstuff, Coco the Electronic Monkey, Star Crunch og Dr. Delecto & his Invisible Vaportron innanborðs. Þeir tveir síðastnefndu hafa hins vegar haldið sig fjærri almenningi síðustu árin en aðrir áhafnarmeðlimir eins og Blazar the Probe Handler og Trace Reading að sama skapi skotið upp kollinum auk þess sem hinir sérlegu hjálparkokkar The Brannock Device, Mr. Q-Beam og Agent 317x hafa verið gerðir sýnilegri. Fram að þeir höfðu þeir einungis utan sjónsviðs okkar jarðarbúa, sem er vitaskuld takmarkað, og því alltaf verið til staðar án þess að nokkur hefði tekið eftir þeim áður!

Þegar þessir tónelsku geimkallar höfðu komið sér þægilega fyrir á jörðinni og brugðið sér í dulagervin fannst þeim alveg eins gott að ganga alla leið og gefa út plötuna ‘Is it Man…Or Astro-Man?’ á meðan viðgerð geimsskipsins færi fram. Lagfæringarnar drógust hins vegar á örlítið á langinn á meðan plötunum fjölgaði og orðnar vel á fjórða tuginn, bæði stórar og smáar. Þær helstu, auk frumraunarinnar, eru ‘Destroy All Men!’, ‘Your Weight on the Moon’, ‘Live Transmissions From Uranus’, ‘Project Infinity’, ‘Intravenous Television Continuum’, ‘What Remains Inside A Black Hole’, ‘Deluxe Men In Space’, ‘Experiment Zero’, ‘1000X’, ‘Made From Technetium’, ‘EEVIAC’ og ‘Spectrum of Infinite Scale’ og einkennast allar sem ein af kraftmiklu og eitursvölu brimrokki sem oftar en ekki er kryddað með einkennilegum hljóðbrotum úr eldgömlum sci-fi bíómyndum. Elstu plöturnar eru þó ívið hrárri enda töldu menn þá bara í byrjuðu að spila en fór svo að pæla æ meira í útsetningunum með aukinni aðstoð tölvutækninnar.

Eins og áður segir kom Man…Or Astro-Man? ekki til jarðar með neitt illt í hyggju en eftir að hafa mátt dúsað hér í drjúga stund fannst þeim tilvalið að reyna að ná heimsyfirráðum enda virtist það siður þeirra geimvera sem þeir sáu í bíómyndum. Meðlimir hljómsveitarinnar fóru því út um víðan völl og sendu auk þess einræktar útgáfur af sjálfum sér til að spila sem víðast og vöktu alls staðar athygli fyrir líflega framkomu. Einræktunin var þó reyndar fyrst og fremst til komin vegna þess að geimverur eiga jafnan erfitt með að fjölga sér með jarðarbúum og því var þetta eina rökrétta lausnin til að deyja einfaldlega ekki út.

Þegar ný öld gekk í garð ákváðu Man…Or Astro-Man? að hægja aðeins ferðina og síðan ‘A Spectrum of An Infinate Scale’ og safnplatan ‘Beyond the Black Hole’ komu út hefur óvenju lítið heyrst frá ævintýrum þeirra. Það má vel vera að þeir hafi loks komið geimskipinu sínu í samt lag og ákveðið að halda til heimkynna sinna en þau munu vera á stað sem kallaður er Grid Sector 23-B61. Hvort sem það er raunin eður ei er ljóst að þeir hafa skilið djúp spor eftir sig hér á jörðinni þó þeim hafi jafnframt að mestu tekist að fela sig fyrir almenningi og óvinveittum viðskiptajöfrum. Um leið rokkuðu þeir meira og harðar en flestir gætu nokkurn tímann látið sig dreyma um og ákveða vonandi að snúa aftur áður en langt um líður með tilheyrandi hávaða og hvelli.



Ef einhver er enn að lesa þá mæli ég einnig með bandi sem hét Shadowy Men on a Shadowy Planet. Það er enn erfiðara að finna dót með þeim heldur en Man or Astroman en það er sagt slatti á Kazaa held ég….