Frábært …til lukku með þetta Steini!!!:)

Gott mál! Til hamingju með alheimsdreifungu Steini!

YAGYA - RHYTHM OF SNOW [FORCE INC] (4/5)

Frábær fyrsta breiðskífa frá Aðalsteini Guðmundssyni, sem einnig hefur kallað sig Plastik, Sanasol og fl.

Aðalsteinn Guðmundsson er náttúrubarn þegar kemur að raftónlist og hefur hann í gegnum tíðina samið ótrúlega mikið af flottri raftónlist sem jafnast fullkomnlega á við það besta úti í heimi. Hann hefur sérstakan stíl á tónlist sinni sem fólk fer fljótt að þekkja ef það fylgist með honum. Hann hefur mjög góða tilfinningu fyrir rhythma, melódíum, hljóðum og uppbyggingu. Hann er ein af björtustu vonum okkar í raftónlistinni og bara vonandi að hann fari að setja nafn sitt á heilabörkinn hjá fólki um allan heim.
Á þessum disk sem gefinn er út hjá hinni vel umtöluðu og frábæru útgáfu Force Inc. er hann að gera góða hluti. En hjá Force Inc. hafa nokkrir íslendingar gefið út og eru fleiri að stefna þangað í framtíðinni. Að mínu mati eru það útgáfur frá Force Inc., Force Tracks og Mille Plateux sem eru að gera bestu hlutina í minimalískri og taktfastri raftónlist í dag. Þaðan kemur tónlist frá listamönnum eins og SND, Gas, Mike Inc og fleirum sem eru að skapa nýja tónlistarheima. Það eru 12 Tónar sem eru duglegastir við að flytja tónlist inn frá Þýskalandi og það er mjög fyndið að hugsa til þess að tónlist okkar listamanna sé sérinnflutt frá Þýskalandi.
Tónlistinn á Rhythm Of Snow er draumkennd, symphonísk og er seiðandi púls inni í dýpstu svæðum regnskóganna, þar sem fjölbreytt og litskrúðugt líf er eins framandi eins og ferð til Mars. Tónlist Steina tekur mann með sér á ferðalag og þegar diskurinn endar fyllist maður af óstjórnandi löngun til þess að setja hann á byrjun aftur.
Rhythm Of Snow er vafalítið ein af betri plötum þessa árs í íslensku deildinni og þarf mikið að ganga á ef þessi diskur endar ekki í topp 5 næsta árs. Ég veit með vissu að Rhythm Of Snow á eftir að vera lengi í spilaranum hjá mér, því ég veit ekki um betri disk til það sofna við en þennan. - ILA -