Hvers vegna hlægja börnin

þegar þú horfir í augu þeirra?

hvers vegna hlaupa folöldin

á kyrrum vorkvöldum?

hvers vegna fara lömbin

í eltingaleik á skurðruðningnum?


af því þau þekkja ekki

framtíðina sem stendur álengdar


sem bíður eftir þeim eins og

hvítklæddur öldungur

með torræðan svip


og kallar þau til sín

þegar þau eru tilbúin


lækurinn sprettur upp úr

lindinni, tær eins og

sannleikurinn, gegnsær

eins og gler


þegar ég var barn

lék ég mér oft í bæjargilinu

og hlustaði á lækinn

hríslast á milli steinanna


stundum á kvöldinn

þegar hljóðbært var

heyrði ég þungan dyn í fjarska


löngu seinna

komst ég að því

að þetta var niðurinn í stóra fljótinu

handan við heiðina

þangað sem vegurinn lá


þetta var niðurinn í stóra fljótinu

sem að lokum

hremmdi litla lækinn úr gilinu

og bar hann til sjávar


þegar ég var barn!


hvað er ég núna?


tíu stafa kennitala,
vegabréf,

færsla í þjóðskrá


tannhjól í úrverki

heimsvædds

hagkerfis


örsmá eining í

hagtölum

Seðlabankans


lítið sandkorn í
steypudælum
atvinnulífsins


nú leik ég mér á
róluvelli lífsbaráttunnar

og hlæ til að komast
í gegn um daginn