Nýstraujuð silkihvít skyrtan
colgate brosið snöggbræðir Vatnajökul
stælltur margverðlaunaður VSOP rass
dúx í djammdansi JónPéturs & Klöru

geng framhjá honum en skyndilega stöðva!
það er biðskylda og hægri regla og…
Guð lemur mig fast í hausinn með skóflu

ranka við mér heima hjá honum í himnaríki
englarnir syngja svo fallega allt í kring
hlýlegt bros væntumþyggju umleikur andlit hans
augun glitrandi perlur svartnættisins

eldfjöll gjósa og virkjanir bresta
Davíð Odds. slær til fréttamanna í beinni
Keikó sleppur úr kvínni og Breiðholt brennur
Íslendingar flýja í umvörpum af eyju brott

hann rekur upp skerandi öskur Tarzans apabróðirs
sælutilfinningin umleikur mig alla eins og skjálfti
líkaminn titrar af undrun yfir þessari nýju uppfinningu
ætla bókað að sækja um einkaleyfi á morgun

heimurinn snögghitnar allur um leið og hamskiptingin hefst
úr rauðum hausnum byrja að vaxa horn og úr bakhlutanum hali
glottir kvikindislega með ómennskum skærgulum augum

“Drullaðu þér út!”