Alex Ferguson vonar að Raúl verði ekki með Real Madrid í seinni leiknum gegn Manchester United í fjórðungsúrslitum meistaradeildarinnar en hann verður spilaður á Old Trafford.

Alex Ferguson segir orðrétt: ,,Það er erfitt að leika gegn Raúl þegar hann tekur sér stöður eins og hann gerði í kvöld. Hann virðist alltaf vera utangarðs hjá þeim og það er ávallt erfitt að ráða við hann. Við þekkjum Zidane og Figo sem eru báðir frábærir leikmenn, en við getum alltaf stöðvað þá. Raúl var mjög erfiður. Ég er bara að vona að honum sé illa við ferðalög. Ef svo er ekki, munum við koma í veg fyrir að hann komist inn í landið fyrir seinni leikinn. Real Madrid hafa keypt nokkra frábæra leikmenn á seinustu árum en Raúl er sá besti í heimi’’. Vicente Del Bosque segir reyndar að Raúl hefði staðið sig mjög vel, þó hann vildi ekki hrósa neinum leikmanni frekar en öðrum en hann segir: ,,Raúl var einn af fjölmörgum frábærum leikmönnum í frábærum leik.

Del Bosque segir reyndar að þeir eigi langt í land með að fagna sæti í undanúrslitum þótt þeir hafi farið með sigur af hólmi í fyrri leiknum. ,,Þetta voru góð úrslit fyrir okkur í kvöld, en þetta er allt ennþá opið upp á gátt. Við verðum að muna hvernig United lék þegar við mættum þeim síðast á Old Trafford. Staðan var 3-0 fyrir okkur en United barðist rosalega og skoruðu tvisvar áður en leiknum lauk. Fyrri hálfleikurinn var frábær hjá okkur og ég held að við höfum sýnt að þarna voru tvö lið með frábæra leikmenn tilbúin yil að sækja. Það er kannski rétt að við hefðum getað unnið auðveldari sigur og við áttum kannski meira skilið en United er mjög hættulegt lið og fékk sín færi’’ sagði Vicente að leik loknum. ,,Þetta var frábær leikur með mörgum mörkum, mikilli spennu og öllu, við sýndum góðan leik en það eru u.þ.b. 90 mínútur eftir á Old Trafford’’ sagði Raúl en hann var hetja Madridinga í leiknum.

Síðari leikurinn verður samt enginn dans á rósum fyrir United því að bæði Gary Neville og Paul Scholes verða í banni í seinni leiknum eftir að hafa fengið gul spjöld í fyrri leiknum, og þó John O’Shea eigi auðveldlega eftir að geta fyllt upp í skarð Nevilles, þá segir Ferguson að erfiðara verði að finna staðgengil fyrir Paul Scholes. Juan Sebastian Veron er nú samt að koma sér saman í andlitinu og ætlar að reyna að koma sér í leikhæft form fyrir seinni leik liðanna á Old Trafford.