Þau góðu og gleðilegu tíðindi voru að spyrjast rétt í þessu að nýi, væntanlegi sjálfstæðismeirihlutinn í Reykjavík ætli ekki að láta kosningaloforðin nægja, heldur sé nú búinn að ákveða að standa við þau líka. Björn Bjarnason segist gleiðbrosandi og hiklaust ætla að bretta upp ermarnar og standa við allra fyrstu loforðin innan 48 stunda frá kosningunum.

- Og hvað verður þér nú fyrst fyrir að standa við, þegar þú ert búinn að bretta upp ermarnar og farinn að brosa, Björn minn?
“Ja sko á fyrstu 48 klukkutímunum ætla ég að gera tvennt: Ég ætla að reka Ingibjörgu Sólrúnu og ráða mig í staðinn. Það er tvennt.”

- Já, það er nú auðvitað ágætt. En svo ætlarður líka að gera fleira?

“Ég er nú hræddur um það Gysur minn. Þetta er allt nákvæmlega skipulagt. Á fyrstu 48 dögunum ætla ég svo líka að gera tvennt.”

- Ja hérna. Það líst mér vel. Og ertu kannski búinn að ákveða hvað þú ætlar að gera?

“Ég er nú hræddur um það. Á fyrstu 48 dögunum ætla ég að láta semja skýrslu þar sem fram kemur í niðurstöðunum að Reykjavíkurlistinn hafi aldrei gert neitt, nema bara sóa fjármunum skattborgaranna í Línur og Net. Fyrir nú utan náttúrulega að skrifa undir endalausar og marklausar viljayfirlýsingar með honum Jóni þarna að austan.”

- Já það er auðvitað snilldarhugmynd. En hvað er hitt sem þú ætlar að gera fyrstu 48 dagana.

“Fara í sumarfríið mitt.”

- Já. Þú verður auðvitað orðinn þreyttur eftir þetta allt saman. En hvað ætlarðu svo að gera þegar þú ert búinn að hvíla þig í 48 daga?

“Ja, sko á fyrstu 48 vikunum í borgarstjórastólnum ætla ég svo líka að gera tvennt. Fara út á Geldinganes og þegar ég er kominn þangað ætla ég að stöðva umhverfisslysið. Það er tvennt. En ég ætla ekki að láta þar við sitja. Á fyrstu 48 mánuðunum í embætti ætla ég svo nefnilega að gera tvennt í viðbót. Ég ætla að hætta við að byggja höfn í Geldinganesinu. Það er eitt. Svo ætla ég að láta byggja þar íbúðir. Það er annað. Þannig að þetta er sem sagt tvennt.”

- Ég sé að þú ætlar að verða alveg rosalega duglegur borgarstjóri. Ég þakka þér kærlega fyrir spjallið og óska þér allrar velgengni. Ég held bara að ég kjósi þig sjálfur.

“Bíddur rólegur, maður. Ég er ekki búinn. Ég er rétt að byrja. Ég á alveg eftir að segja þér frá því að á fyrstu 48 árunum ætla ég svo að gera tvennt í viðbót. Ég þarf annars vegar að finna eitthvert fólk sem er til í að flytja inn í íbúðirnar á Geldinganesinu og eftir fyrstu 48 árin ætla ég svo líka að vera búinn að standa við það kosningaloforð að öll gamalmenni sem nú eru komin yfir nírætt verði þá búin að fá langlegupláss.”