Að sjálfsögðu er þetta della. Ef einhverjum tekst að sanna að þyngdaraflið sé lögmál sem ávalt gildir þá skal ég éta hattinn minn.

Ég tek mér þetta orðatiltæki ekki oft í munn, enda finnst mér það bera vott um grundvallarmisskilning á vísindum, hvernig þau virka og hvað þeim er yfirleitt ætlað að gera.

En ef ég nota þetta orðalag, þá á ég fyrir mitt leyti einungis við að tilraunir, athuganir, rannsóknir o.s.frv. bendi til einhvers, þ.e.a.s. að vísindaleg eftirgrennslan gefi eitthvað til kynna, að við höfum ástæðu til að ætla eitthvað vegna þess að niðurstaða rannsóknar með ákveðna aðferðafræði (vísindaleg rannsókn) styður það. Ef ég hefði mjög mikið traust á rannsóknunum sem væru til umræðu gæti ég jafnvel meint að vísindin hafi sýnt fram á eitthvað - a.m.k. þar til annað kemur í ljós; með öðrum orðum að tilraunir, athugandir eða rannsóknir virðist sýna eitthvað og það hafi ekki enn verið hrakið og verði kannski seint hrakið.

Það er auðvitað ekkert að því að halda að einhver vísindaleg rannsókn hafi sýnt fram á eitthvað, þó svo að það sem vísindin gera öðru fremur sé ekki að reyna að sanna eitt né neitt. Gleymum bara aldrei orðum Ara: Hafa skal það sem sannara reynist.

Algeng (og nokkuð gamaldags verð ég að segja) merking orðsins “sönnun” er algjör vissa um að eitthvað ER einhvern vegin og að allir sjái það eins. En það er í raun ekkert annað en trú á að mynstrin ofin úr þeim upplýsingum sem skynfærin gefa okkur séu eitthvað meira en líkön.

Hins vegar er hægt að sætta sig við að maður lifi bara í hugarburði, í besta falli líkani. Þá er ekki úr vegi að endurskilgreina sönnun til að gera þetta orð nothæft.
(Eftirfarandi er bara tillaga að nýrri skilgreiningu):
Sönnun er þegar upplýsingar passa inní líkanið manns, og til að eitthvað geti passað inní líkanið þarf líkanið að vera línulegt og búið til úr mynstrum (ég lít á óreiðu sem mynstur sem er of flókið fyrir mig til að sjá út). Ég get ekki hugsað mér hvernig hlutir eigi að geta “passað” í ólínulegu líkani, með línulegu líkani er líka hægt að sjá út eyður í líkaninu (kallað ímyndunarafl…).
Vísindaleg sönnun eru upplýsingar um að vísindamenn hafi fengið upplýsingar (úr tilraunum væntalega, samkvæmt hinni vísindalegu aðferð) sem passa inní líkan vísindanna. Hvort það passi inní manns eigið líkan og teljist sönnun er annað mál og fer eftir því hversu líkt líkan vísindanna er manns eigins. Með nýjum upplýsingum breytast líkön, þar með talið vísindanna.

Það er ekkert sem heitir Vísindaleg sönnun.