Þriðji úrslitaleikur KA og Hauka, um Íslandsmeistaratitilinn í handknattleik karla, fer fram í KA-heimilinu í kvöld. Staðan í einvígi liðanna er jöfn 1:1, en þrjá sigra þarf til þess að hreppa Íslandsbikarinn. KA sigraði í fyrsta leiknum á Akureyri og Haukar svöruðu fyrir sig í Hafnarfirði í öðrum leiknum.

KA þarf aðeins að sigra í einum leik til viðbótar til að tryggja sér Íslandsmeistaratitilinn í handbolta. KA sigraði Hauka örugglega, 27:18 á Akureyri, í þriðja úrslitaleik liðanna. KA hefur nú tekið 2:1 forystu í einvígi liðanna. Leikurinn í kvöld var spennandi framan af og munaði aðeins þremur mörkum á liðunum í hálfleik. Í síðari hálfleik gáfu KA-menn hinsvegar í og náðu fljótlega öruggu og þægilegu forskoti sem þeir héldu til loka.

Guðjón Valur Sigurðsson átti stórleik í liði KA en hann skoraði 9 mörk. Andrius Stelmokas var einnig mjög atkvæðamikill með 8 mörk og Halldór Jóhann Sigfússon skoraði 3 mörk. Hörður Flóki Ólafsson varði mjög vel í marki KA, um 20 skot.

Hjá Haukum voru þeir Rúnar Sigtryggsson og Ásgeir Örn Hallgrímsson markahæstir með 5 mörk hvor. Jón Karl Björnsson og Aliaksandr Shamkuts skoruðu 3 mörk hvor. Bjarni Frostason náði sér ekki á strik í marki Hauka en hann varði aðeins 4 skot. Magnús Guðbjörn Sigmundsson varði 5 skot.