Ralf hugsanlega með ólöglegt bensín
Hugsanlega fær Ralf Schumacher hjá Williams ekki að hefja keppni í Brasilíukappakstrinum við hlið bróðurs síns Michaels á fremstu rásröð á morgun þar eð eftirlitsmenn keppninnar telja hann hafa brúkað ólöglegt bensín.
Aldrei áður hafa bræður byrjað keppni í Formúlu-1 af fremstu tveimur ráslínunum og var því talið að Schumacherbræðurnir hefðu brotið blað í sögu íþróttarinnar.
Nú hefur árangur Williamsökuþórsins verið dreginn í efa og verður ekki viðurkenndur leiði frekari athuganir á eldsneyti úr bíl hans og birgðum Williamsliðsins í ljós að ekki hafi verið allt með felldu í þeim efnum.
Michael Schumacher vann sinn 38. ráspól á ferlinum í dag og þann sjöunda í röð en Ralf Schumacher velti Mika Häkkinen hjá McLaren úr öðru sæti á lokamínútum tímatökunnar.