Hebreanafngift Gyðinga var upphaflega höfð um hirðingja sem fluttu til Egyptalands og voru notaðir sem ódýrt vinnuafl og vinnuþrælar. Þeir yfirgáfu því Egyptaland á 13. öld f.Kr. undir handleiðslu leiðtoga síns Móse og leituðu fyrirheitna lands ættföður þeirra Abrahams (um 18. öld f.Kr.) sem Guð hafði lofað þeim.

Eftir að hafa reikað fjörutíu ár í eyðimörkinni fann Móse að hann lá fyrir dauðanum. Áður en hann dó sýndi Guð honum fyriheitna landið handan við Jórdan, ofan af Abarímfjallinu (einnig nefnt Nebófjall í textanum). Móse var lagður til grafar á heiðum Moabslands gegnt Bet Peór (sjá 5M 31.2; 4M 27.12; 5M 34.1-7). Þrátt fyrir staðgóða lýsingu hefur legstaður Móse ekki fundist sem er undarlegt því að ætla mætti að menn hans hefðu gefið honum veglega útför.

Aftur á móti vísa fimm kennileiti textans til þess hvar gröf Móse er að finna í Kasmír enda koma staðarlýsingar heim og saman við ofangreindar frásagnir Biblíunnar. Þar má meðal annars finna sléttuna Mowu (Moab) sem er 5 km norðvestan við fjallið Nebu (Noab) sem er í Abarímfjallakeðjunni (Abarímfjall). Þar leit Móse yfir fyrirheitna landið í hinsta sinni. Gegnt Bandipur (Bet peór) má finna grafreit Móse sem haldið hefur verið við í 2700 ár. Ofan af fjallinu má líta grösugar og frjósamar sveitir og dalverpi sem minna helst á lýsingu Mósebóka á fyrirheitna landinu sem flýtur í mjólk og hunandi (sjá 2M 3.8,17; 13.5; 33.1-3). Sú lýsing er ekki beint dæmigerð fyrir Palestínu.

Í nágrenni grafarsteinsins er að finna ýmis kunnugleg örnefni og staðarheiti sem bera nafn Móse, samanber Muquam-i-Musa (Mósestaðir) og Sang-i-Musa (Mósesteinn). Yfir 300 heiti sem líkjast heitum úr Biblíunni má finna í Kasmír. Kasmírsbúar virðast eiga margt sameiginlegt með Ísraelum. Innfæddir múslíma kalla Kasmír enn í dag Bagh-i-Suleiman, þ.e. garð Salómons.

Í fyrstu Mósebók (12.4; 24.4) stendur að Abraham hafi fyrst búið á sléttum Harran áður en Guð fyrirskipaði honum að yfirgefa land feðra sinna. Talið hefur verið að Harran sé í norðurhluta Mesópótamíu (Írak). Skammt frá Srinagar í Kasmír er lítill bær að nafni Harwan. Ýmislegt bendir til að þar séu komin upprunaleg heimkynni ættbálks Abrahams. Hebrearnir hafa að líkindum á leið sinni vestur á bóginn haft skamma dvöl í Mesópótamíu og skírt búsetustað sinn Harran, eftir heimabyggð sinni í Kasmír.

Í Kasmír má finna marga afkomendur hinna “týndu sauða af Ísraelsætt” sem Jesús sagðist eiga og vera sendur til (sjá Mt 15.24;10.6;Jh 10.16). Þar er þorra afkomenda hinna tíu týndu ættkvísla Ísraelsmanna að finna sem hafa í þessum fornu heimkynnum feðranna viðhaldið ýmsum siðum sem eru sérkennandi fyrir Gyðinga. Þarna er kominn grunnurinn að hinum margháttuðu tengslum gyðingdóms og kristinnar trúar við austurlensk trúarbrögð. Fyrir kaldhæðni örlaganna hefur hrjóstrug landspilda fyrir botni Miðjarðarhafs orðið bitbein á milli Araba og Gyðinga sem ógnar heimsfriðnum.


Heimildir:
Holger Kersten. Jesus Lived in India. Element, Shaftesbury, Dorset, 1994.