Mér hefur lengi þótt gaman að fræðast um drauga og anda ýmiskonar og langar að vita hvort einhverjir af ykkur hafa hitt drauga? Sérstaklega ef um ærsladrauga hefur verið að ræða.
Þegar ég var 12 ára var frænka mín (köllum hana A.) 13 ára að passa í húsi neðar í götunni minni. Mömmur okkar voru báðar að vinna og enginn heima hjá henni. Um 12 leytið um kvöldið hringir hún í mig grátandi og biður mig um að koma til sín (tek það fram að við vorum alls ekki neinar vinkonur á þessum árum).
Ég fer til hennar og þegar ég labba upp stigann fæ ég veggplatta úr gleri fljúgandi á móti mér. Ég heyri að A. kallar til mín úr stofunni að koma þangað og skríða á hnjánum því þá hitti “hann” ekki. Ég var rosalega hissa og vissi ekkert um hvað hún var að tala en þegar ég er að verða komin inn í stofu (á hnjánum) fæ ég hnúð af kommóðuskúffu í bakið. Ég sný mér við til að sjá hver hafi gert þetta en það er enginn á ganginum. Þegar ég er komin inn í stofu er A. á bak við sófann með annað barnið, 3 ára gamla stelpu. Ég spyr hvar strákurinn sé og hún segir að hann sé inn í herbergi hjá “honum”. Þegar ég spyr hver hann sé, kemst ég að því að A. hefur ekki hugmynd um hver “hann” sé.
Við skiljum stelpuna eftir inni í stofu og förum inn í hjónaherbergið þar sem strákurinn var. Hann stendur í rúminu sínu og er ekki að gráta eða neitt. Hann stendur bara þar (hann var 1 árs) og horfir í átt að náttborðinu. Þá lyftist lampinn á borðinu upp og kemur á móti okkur. Ekki á fullri ferð eins og hitt, heldur hægt og rólega. Hann fer framhjá og að veggnum þar sem er eins og einhver negli lampanum í vegginn og hann splundrast.
Við gripum krakkann og hlupum inn í stofu, tókum litlu stelpuna og fórum út um svalahurðina.
Eftir að við vorum komnar heim til mín var eins og strákurinn leystist úr álögum og hann fór að hágráta.
Enn þá í dag minnumst við A. varla á þetta nema við séum einar, því það er eins og við séum hræddar við að tala saman um þetta.
Nú vil ég vita: Haldiði að þetta hafi verið illur andi í krakkanum eða ærsladraugur?
Við heyrðum aldrei um neitt meira vesen í þessu húsi og fjölskyldan flutti í nýtt hús 3 mánuðum seinna.