Það er einhver sérstök tegund af kantsteinum sem Árni Johnsen keypti fyrir Þjóðleikhúsið og sagði að ætti að nota til að gera við tröppurnar. Fyrir algjöra tilviljun keypti hann nákvæmlega eins kantsteina til að setja í garðinn hjá sjálfum sér á sama tíma.

Nú finnast hins vegar ekki steinarnir sem Þjóðleikhúsið keypti. Stöð 2 bað nefnilega um að fá að taka mynd af þeim en Árni J. segir að þeir séu í geymslu hjá manni sem hann hvorki segist ná í né getur gefið upp hvað heitir. Hmm..

Ekki nóg með það heldur bauð Stöð 2 Árna J. að leggja fram kvittun fyrir steinunum sem hann keypti persónulega til að hreinsa sig af því að Þjóðleikhúsið hefði borgað en hann neitaði því.

Jú jú, þetta gleymist. Guðmundur Árni sem stóð fyrir þvílíkri einkavinavæðingu sem bæjarstjóri í Hafnarfirði og síðan sem heilbrigðisráðherra þannig að hann varð að segja af sér embætti situr ennþá á alþingi og rífur kjaft. Ég var einmitt að reyna að rifja það upp hvað það var sem fyllti mælinn til þess að hann þurfti að segja af sér en ég bara man það ekki. Íslendingar hafa stutt minni og gerspillta pólitíkusa.

Og var ekki Sverrir Hermanns kosinn á þing eftir að búið var að nappa hann fyrir spillingu? Og Hrannar í bæjarstjórn eftir að hafa verið dæmdur fyrir skattsvik? Það er svei mér þá útlit fyrir það að pólitíkusar verði bara meira spennandi við þetta.