[Notanda eytt] fyrir 19 árum, 10 mánuðum Fjöldi lestra: 742

Forsetakosningar árið 2004

Daginn,

Í dag, þann 26/6 árið 2004, er kosningardagur og munu vonandi sem flestir fara á kjörstað og kjósa sinn mann, eða jafnvel skila auðu. Það er nú ólíklegt að við fáum nýjan forseta á Bessastaði, þar sem Ólafur Ragnar ætlar í endurkjör og skoðanakannanir hafa sýnt fram á allt að 65% fylgi Ólafs. Baldur Ágústsson, forsetaframbjóðandi, er tiltörulega nýr í þessum bransa - en fær samt sem áður töluvert meira fylgi en Ástþór Magnússon, sem flestir kannast nú við.

Mig langar að skrifa smá pistil um mennina þrjá - fortíð þeirra og álit mitt á þeim.

Árið 1996 voru kosningar og var þá alveg á hreinu að nýr maður væri á leið inn á Bessastaði - og var Ólafur Ragnar atkvæðamestur, en Ástþór M. tók einnig þátt en ekki voru allir hrifnir af þeim manni. Ólafur var fínn forseti, og hef ég aldrei haft neitt á móti honum. Síðan, árið 2000, átti að kjósa til forseta - en enginn annar en Ástþór ætlaði sér gegn Ólafi en fékk hann ekki nægilega margar undirskriftir til þess að fá að fara í framboð - þó að það mál hafi verið mikið deilumál.

Ástþór lét hins vegar ekki plata sig tvisvar og var extra snemma þetta árið.

-

Baldur Ágústsson býður sig fram sem ‘maður fólksins’ og rosalega finnst mér asnalegt hvað þessi maður veit ekkert um pólitík - og hvað þá forsetaembættið. Baldur var flugumferðastjóri til margra ára og var með öryggisfyrirtækið Vara í mörg mörg ár og á víst helling af peningum - sem hann notar víst að hluta til í auglýsingar og í framboðið sitt.

-

Ástþór heldur að hann verði kosinn til forseta, og þá geti hann bara breytt heiminum - þetta er bara ekki svo auðvelt.

Baldur heldur að hann geti bara fengið forsetastólinn í hendurnar og afturkallað lög sem Ólafur er þegar búinn að staðfesta - þvílík vitleysa.

-

Ólafur sigrar þessar kosningar alveg örugglega, og er eiginlega eina spurning; Hversu mikið fylgi fá hinir tveir frambjóðendurnir…

Ég ætla að enda þetta með smá spurningu, og er öllum frjálst að svara - hvort þeir hafi kosningarétt eður ei.

Hvern á að kjósa/Hvern myndir þú kjósa?

a)Ólaf
b)Ástþór
c)Baldur
d)Skila auðu

Það væri einnig ágætt ef fólk myndi rökstyðja svar sitt.

Kveðja,
Hrannar Már.

andri fyrir 19 árum, 10 mánuðum

Ég kýs Auði Auðuns. Ég vil ekki pólitískan forseta og hugnast ekki þeir aðrir valkostir sem eru í stöðunni.

En svo vil ég skora á alla að nýta kosningaréttinn. Þetta er réttur sem forfeður okkar þurftu að berjast fyrir og dóu fyrir og komandi kynslóðir treysta sömuleiðis á okkur að standa vörð um.
Og munum að ef við stöndum ekki vörð um rétt okkar mun enginn gera það!
“Eternal vigilance is the price of liberty”.

Fyrra álit

Nemesis fyrir 19 árum, 10 mánuðum

a) Ólaf

Mér finnst hann hafa verið góður forseti síðastliðin 8 ár og ég er sammála ákvörðun hans um að beita málskotsréttinum. Ef hann hefði ekki beitt honum hefði ég skilað auðu, því Ástþór og Baldur eru trúðar í mínum augum og hvorugur þeirra á erindi á Bessastaði.

Fyrra álit

Ablaze fyrir 19 árum, 10 mánuðum

Ég er nú ekki með kosningarrétt, en ég held að ég myndi kjósa Bald(ur?) eða skila auðu..

Ástæða fyrir að kjósa Bald(ur?):

Af þeim sem að ég sá t.d. í þættinum í gær var hann langmest sannfærandi og kom vel útúr þessu viðtali þótt hann hafi nú ekki sagt mikið.
Ástþór Magnússon hefur kannski mikið af hugmyndum, mikið af frábærum hlutum, en ég held að hann yrði ekki maður orða sinna og myndi ekki láta verkin tala eins og hann sagðist myndi gera. Utan við það að maðurinn er bara geðbilaður, og svo að ég viti á hann að vera Forseti Íslands, ekki Forseti friðar í heiminum, þá getur hann bara farið að vinna fyrir sameinuðu þjóðirnar. Þessi maður mun aldrei gera neitt gott sem forseti.
Varðandi Ólaf, þá hefði hann átt að beita málskostsréttinum á annað mál, eins og Kárahnjúka, en hann hefði samt líka átt að gera það með fjölmiðlalögin. Maðurinn er bara ekki nógu mikill afrekamaður og hann er ekki að gera það sem gera þarf, hann er búinn að gera forsetaembættið að engu, plús það að hann var með leiðinlegan hroka í gær og það var ótrúlegt hvernig stjórnendurnir hjálpuðu honum alltaf úr klípunni eins og þetta varðandi noðrurljós þar sem hann vildi ekki svara, hann sagði bara að hann þyrfti þess ekki, þá hefðu stjórnendurnir átt að pressa að honum.

En nú að Baldri, Baldur myndi, að ég held, endurheimta virðingu forsetaembættisins og gera það vel, hann var með mjög sannfærandi kosningaáróður, sem vonandi var sannur, auk þess að virðast vera rétti maðurinn í þetta…En eini gallinn við hann er, að hann virðist ekki vita mikið hvað hann á að gera, þessvegna gæti hann verið vanhæfur. Það væri þá ástæðan fyrir því að ég myndi skila auðu, en þó held ég frekar að ég myndi kjósa hann. En ég þarf bara að bíða fram í næstu kosningar, þá get ég kosið þann sem ég vil…

Samt eitt sem ég vil koma á framfæri:
Ólafur á (því miður) pottþétt eftir að rústa þessum kosningum, ég spái honum með ca 75% fylgi, Baldri ca 23% og Ástþóri ca 2%.
En sjaldan hafa verið kosningar jafn óspennandi, þetta er til dæmis í fyrsta sinn sem að ekki hefur verið kosningavaka á meðan kosið er til forseta…Og væntanlega verður bara svona 60-70% þátttaka…

En takk fyrir..Kv. Alexande

Ef þú átt eitthvað vantalað við mig….slepptu því að segja það.

Fyrra álit

Nemesis fyrir 19 árum, 10 mánuðum

nf. Baldur
þf. Baldu

Fyrra álit

[Notanda eytt] fyrir 19 árum, 10 mánuðum

Ég gleymdi að nefna í greininni að ég myndi, ef ég væri með kosningarétt, skila auðu.

Ég spái þessu svona;

Ólafur - 55% c.a.
Baldur - 15% c.a.
Ástþór - 5% c.a.
Auðir seðlar - 25%

Fyrra álit

Nemesis fyrir 19 árum, 10 mánuðum

Þú ert heldur bjartsýnn þykir mér. Sjálfur myndi ég halda að auðir seðlar verði á bilinu 10-20%.

Fyrra álit

[Notanda eytt] fyrir 19 árum, 10 mánuðum

Það myndi ekki koma mér á óvart ef auðir seðlar færu upp í 30 prósent.

Alveg ótrúlega margir sem ætla að skila auðu til að sýna Ólafi hvað þau eru ósátt við hann - og ekki bara vegna fjölmiðlalaganna. Ólafur er samt eini maðurinn þarna með viti og er löngu vitað að hann verður kosinn.

Það er samt möguleiki að Davíð túlki auða seðla sem stuðning við sig og fjölmiðlalögin - en það er bara rugl.

Fyrra álit

Nemesis fyrir 19 árum, 10 mánuðum

Ég horfði á forsetaframbjóðendaþátt á stöð2 í gær og þar var gerð sms-könnun þar sem 2000 manns tóku þátt, sem verður að teljast mjög mikið, t.d. miðað við þessar 800 manna Gallup kannanir þar sem einungis 60-70% taka afstöðu!

Niðurstöðurnar:
63% - Ólafur Ragnar
17% - Baldur
5% - Ástþór
15% - Skila auðu

Ég reyni að hafa spánna mína hlutlausa og byggi hana aðallega á þessum niðurstöðum, en ég gef þeim 5% skekkjumörk vegna þess að eftir þessa könnun fór fram annar umræðuþáttur á RÚV og eitthvað gæti hafa breyst þá. Ég sé enga ástæðu til að áætla að þessi tala tvöfaldist, eins og þú virðist jafnvel búast við. 10-20% stendur hjá mér :

Fyrra álit

[Notanda eytt] fyrir 19 árum, 10 mánuðum

Ég sá þennan þátt líka - við skulum bara bíða eftir kvöldinu. Maður getur ekki ákveðið prósenturnar útfrá einhverjum 2000 manns.

PS : Hvað fær fólk til þess að eyða 39 krónum í hvert símtal í þessum þætti þarna á Stöð2…

Fyrra álit

andri fyrir 19 árum, 10 mánuðum

Það er ekkert mark takandi á könnunum þar sem fólk ræður hvort það tekur þátt - tala nú ekki um ef það kostar að taka þátt eins og er með SMS kannanir. Þetta hefur nú lengi verið vitað og er t.d. ástæða þess að netkannanir eru gjörsamlega ómarktækar.

Einu kannanirnar sem eitthvað mark er á takandi er þegar tekið er slembiúrtak úr þjóðskrá (það er ekki nóg að taka bara slembiúrtak úr símaskrá - getur verið mjög misvísandi).

Fyrra álit

Nemesis fyrir 19 árum, 10 mánuðum

Þetta er ekki rétt hjá þér. Sem dæmi má nefna Plúsinn (www.plus.is). Þarna færðu e-mail og tekur þátt í könnun og hafa margar stjórnmálakannanir verið gerðar þarna sem sýna sömu niðurstöðu og venjuleg könnun með slembiúrtaki úr þjóðskrá (innan við 1% munur á niðurstöðum).

Kostirnir við Plúsinn eru margir. Sem dæmi má nefna fjölda þáttakenda; þáttakendur í hverri könnun skipta tugum þúsunda, sem þýðir að skekkjumörkin lækka svo um munar. Annar kostur er að vegna fjölda þáttakenda er hægt að flokka niðurstöður eftir aldri, menntun, starfssviði, búsetu og samt helst nákvæmnin. Svo er engin fyrirhöfn að framkvæma skoðanakönnunina, þú sendir einfaldlega út könnunina og niðurstöðurnar skila sér sjálfkrafa inn, á meðan þú þarft fletta upp og hringja í hvern einasta til að fá svar í slembiúrtaki.

Þetta er gott dæmi þess að netkönnun getur verið beinlínis nákvæmari og hentugari en slembiúrtak úr þjóðskrá.

Fyrra álit

andri fyrir 19 árum, 10 mánuðum

Ég geri þá ráð fyrir því að þú getir nefnt dæmi?

Hinsvegar eru kannanir Plússins framkvæmdar með öðrum hætti en aðrar netkannanir. Í flestum tilfellum er þetta svo að fólk fer inn á tiltekna heimasíðu til að kjósa (eins og hjá Fréttablaðinu) og slíkar kannanir gefa mjög oft skekkta mynd af raunveruleikanum því það er ekki alvöru þverskurður af þjóðinni sem tekur þátt í slíkum könnunum.

Sama má reyndar segja um Plúsinn að einhverju leyti. Ég býst t.d. fastlega við að mun fleiri tekjulágir en tekjuháir taki þátt í könnunum Plússins (v/verðlaunanna) og sömuleiðis meira af yngra fólki en eldra fólki. Slíkt kallast vart þverskurður af þjóðinni.

Alvöru skoðanakönnun verður að hafa algert slembiúrtak.

Fyrra álit

DCT fyrir 19 árum, 10 mánuðum

Kannski geta einhverjir hérna útskýr fyrir mér það sem ég ekki skil. En EF ég er að skilja þetta alltsaman rétt varðandi fjölmiðlafrumvarpið þá held ég að það sé að koma tími á að flytja aftur úr Landi!

Undanfornum árum hafa verið hin ýmsu málefni sem almenningur hafði mun meiri áhuga á heldur enn fjölmiðlafrumvarpið. T.D kárahnjúkum til að nefna eitthvað.

En Ólafur nýtir sé neitunarvaldið NÚNA sem segir mér ekkert annað en að það eru peningar kallarnir sem ákveða þetta og að það urðu “átök” milli peninga kallana sem stjórna Alþingi og þeim sem stjórna Bessastöðum. Þannig að þetta hefur EKKER að gera með hvað almenningur vill.

Viljum við hafa hlutina svona!?!
Ég er allveg búin að fá mig full sadd/an á þessum valdamönnum á Íslandi!

-DCT hvetur alla til að skila auðu og hvetja hæfari aðila í framboð, þó það verði ekki fyrr en eftir 4 ár!-

Fyrra álit

[Notanda eytt] fyrir 19 árum, 10 mánuðum

Balla- hann er nýr í bransanum og er gaman að sjá hvernig hann spreytir sig.
————————
Ástþór er bara kommadjöfull sem mun neita öllu sem alþingismenn ákveða. Og verða þá þjóðarkosningar hvað eftir annað, þótt fólki sé yfirleitt sama um hvað málefni varðar.
———————-
Ólafur er svosem fínn náungi en sagði sjálfur áður en hann byraði að forsetaembættið ætti að vera hreyfanlegt, og lýsti yfir óánægju sinni yfir því hvað Vigdís Finnbogadóttir var lengi forseti en það voru 16 ár. Samt er hann að sækja um í þriðja sinn. Ég er alveg sammála honum, þetta á að vera hreyfanlegt og því tími til kominn að hann hætti.
—————–

Fyrra álit

Axelma fyrir 19 árum, 10 mánuðum

Ég sjálf trúi ekki á það að skila auðu, sjálfri mér finnst það vera réttast að kjósa skásta kostinn.

Skásti kosturinn í þessum kosningum finnst mér vera Ólafur Ragnar Grímsson og fékk hann mitt atkvæði.

Ef ég myndi skila auðu, finndist mér ég ekki hafa rétt á því að kvarta undan slæmum kjörum eða kvarta undan því hvað forsetinn er mikill skíthaus o.s.frv. Því þótt ég hefði “tekið þátt” með því að skila auðu, þá minnkaði ég ekki líkurnar á því að fá versta kostinn yfir mig.

Mér finnst voðalega skrítið að BÁ telur sig geta afturkallað ákvörðun ÓRG, því þótt hann næði kjöri til embættis, þá tæki hann við því þegar þjóðaratkvæðagreiðslan væri yfirstaðin, og hana er ekki hægt að afturkalla.. Jú.. nema að hann vilji láta landann ganga afturábak í þróun og vera grýttur nær til dauða í hvert skipti sem hann sæist á almannafæri.

ÓRG fékk mitt atkvæði, og er það mín sannfæring að hann sé skásti kosturinn, því hann gaf mér tækifæri á því að nýta réttindi mín í þjóðaratkvæðagreiðslunni og taka þátt.

Axelma

Fyrra álit

andri fyrir 19 árum, 10 mánuðum

Við getum orðað þetta sem svo að mér þyki allir kostirnir jafn slæmir. Þessvegna skila ég auðu.
Að skila auðu eru líka skilaboð til þess sem sigrar að hann ætti í það minnsta að hugsa sér til hreyfings að loknu því kjörtímabili sem nú fer í hönd.

Fyrra álit

Uber fyrir 19 árum, 10 mánuðum

Hvernig geturðu mögulega haldið því fram að allir kostirnir séu jafnslæmir? Ólafur Ragnar er augljóslega eini maðurinn í framboði sem er fær um að vera forseti. Ástþór er viðundur og Baldur gerir ekkert nema tyggja aftur dylgjurnar úr Hannesi H. og Davíð í þeirri von að sjálfstæðismenn kjósi sig.

Fyrra álit

andri fyrir 19 árum, 10 mánuðum

Nú? Friðarverðlaunahafi Nóbels og fyrrverandi forseti Costa Rica er algerlega ósammála þér um Ástþór.

Sömuleiðis held ég þú hafir ekki fylgst vel með forsetaframbjóðendunum ef þú heldur að Baldur hafi eitthvað verið að éta upp einhver ummæli eftir Hannesi Hólmsteini og Davíð Oddssyni. Þvert á móti hefur hann gert mjög lítið af því (Ástþór hefur verið að ásaka Ólaf þeim mun meira). Hinsvegar hefur hann sagt að það þurfi að endurheimta virðingu fyrir forsetaembættinu og að hann hefði, sem forseti, ekki synjað fjölmiðlalögunum undirritunar. Eru það dylgjur?
Ég held þú þurfir að hafa eitthvað fyrir þér ef þú ætlar að ásaka Baldur um dylgjur.

Ólafur er kannski hæfasti frambjóðandinn en ég hlýt að mega nota atkvæði mitt til að mótmæla því hvernig Ólafur Ragnar hefur breytt eðli forsetaembættisins undanfarið. Í raun er þetta miklu frekar þjóðaratkvæðagreiðsla um Ólaf og hans sýn á embættið heldur en eiginleg forsetakosning. Að óbreyttu verður nefnilega pólitík alltaf með í spilunum þegar kosið verður um forseta í framtíðinni. Það hljóta allir að sjá að annarsvegar vinstri maður eins og Ólafur og hinsvegar hægri maður myndu beita synjunarvaldinu með mismunandi hætti og fólk mun taka tillit til þess þegar næsti forseti verður kosinn.
Sömuleiðis hlýtur það að vera nokkur traustsyfirlýsing við túlkun Ólafs á synjunarvaldinu að kjósa hann núna, ekki satt?

Fyrra álit

Uber fyrir 19 árum, 10 mánuðum

Já, það er rétt að forseti Costa Rica virðist sjá Ástþór í allt öðru ljósi en flestir Íslendingar…

Baldur hefur tönnlast svolítið á því að forsetinn þurfi að vera ‘fjárhagslega sjálfstæður’ - sem hljómar örlítið eins og hann sé að gefa í skyn að Ólafur sé á launum hjá Baugi. Mér finnst ég hafa heyrt eitthvað því líkt frá HH og DO. Annars fannst mér Baldur hafa jarðað allt sem hann hefur sagt um virðingu fyrir forsetaembættinu með því að fíflast í sjónvarpsþættinum 70 mínútum um daginn.

Annars er það líka alveg rétt að það fer eftir sannfæringu forsetans hvernig hann beitir neitunarvaldinu - rétt eins og það hvort hann er hægri eða vinstri maður. Þetta neitunarvald hefur þó, að ég held, alltaf verið til umræðu fyrir forsetakosningar og þar af leiðandi hefur alltaf verið tekið tillit til þess við kosningarnar sjálfar.

Fyrra álit

Fleebix fyrir 19 árum, 10 mánuðum

ég hef þegar gert grein fyrir atkvæði mínu hér [http://www.hugi.is/daegurmal/greinar.php?grein_id=1635 2324], og svar mitt við andmælum má finna á sama stað.

Kosningarnar 2004 eru djók þar sem ekki einu sinni auðir miðar hafa lengur mótmælagildi.

Fyrra álit

IngvarL fyrir 19 árum, 10 mánuðum

Ég missti nú af þessu umræðu í gær og veit því ekki um hvað fór fram þar en ef ég væri með kosningarétt, sem ég fæ á næsta ári þá myndi ég mjög líklega kjósa Baldur.

———————————
Ástþór = Maður þarf nú varla að rökstyðja það af hverju maður myndi ekki kjósa hann en þó að hann hafi góðar hugmyndir getur hann bara ekki framkvæmt þær sem forseti þar sem forseti myndar ekki utanríkisstefnuna og ef hann myndi til dæmis gagnrýna stríðsrekstur einhversstaðar eða eitthvað sem þingið er búið að lýsa blessun sinni yfir, gæti vel trúað honum til að gera það þá myndi þingið líklega lýsa yfir vantrausti á honum og hann þyrfti að víkja
————————————
Ólafur = Eins og hann sagði mjög oft í þessari baráttu þá hefur fólk haft 8 ár til að dæma hann og finnst mér hann ekki hafa leitt neitt gott af sér á þessum árum. Til dæmis finnst mér að hann hefði átt að skrifa undir fjölmiðlalögin og hefði hann eflaust gert það hefði hann ekki þessi tengsl við Baug sem hann vill nú varla leggja í hættu. Svo finnst mér hann vera alltof mikið í Aspen en forsetinn ætti nú að vera í landinu mestallan tímann og láta sjá sig hér og mér finnst að hann hefði átt að mæta í brúkaupið í Danaveldi
——————————————-
Baldur = Eins og hann segir í herferð sinni ætti forseti ekki að vera háður einhverju fjármála eða stjórnmálavaldi. Ég held að enginn frambjóðandanna sé háður einhverju stjórnmálavaldi en ég held að Ólafur sé nú býsna háður fjármálavaldi þar sem það kostar að halda kosningarherferðir og svona. Ég held að hann gæti haft margt gott af sér að leiða og mér finnst að hann eigi allaveganna að fá tækifæri, allaveganna frekar en Ástþór og Ólafur hefur þegar fengið sitt tækifæri og klúðraði hann því.

Fyrra álit

[Notanda eytt] fyrir 19 árum, 10 mánuðum

Ef ég væri með kosningarétt þá myndi ég líklegast skila auðu. Mér finnst enginn af þremenningunum standa sérstaklega upp úr, í raun finnst mér enginn þeirra vera hæfur.

Ástþór er eins og flestir vita, eitthvað geðbilaður þó hugmyndir hans séu alveg frábærar. Ég treysti honum samt ekki fyrir embættinu þar sem að honum vantar hrikalega mikla tækni í mannlegum samskiptum og ég er ekki viss um að hann sé maður allra þessara orða. Og það er líka spurning hvort þetta sé allt saman framkvæmanlegt.

Baldur er jáá.. Mér finnst hálf asnalegt af honum að bjóða sig fram. Lítt þekktur og óreyndur í pólítíkinni, kemur svo allt í einu fram og hyggst bjóða sig til forsetaembættis. Hann á nóg af peningum og þess vegna er þetta mögulegt hjá honum. Hann talar mjög mikið um að hefja þetta embætti upp, sem væri mjög gott, en þess á milli blaðrar hann annarsvegar um að hann ætli að vera maður fólksins og ópólítískur, og hinsvegar um að hann hefði samþykkt fjölmiðlalögin o.s.frv.

Ólafur er satt að segja skárstur af þeim og sá eini sem hefur fullt vit. Hann er samt ekki búinn að standa sig nógu vel sem forseti, hefur gert embættið að engu og er ekki nógu duglegur að nýta sitt vald.

Af þremur slæmum kostum er samt Ólafur skárstur og vona ég að hann vinni kosningarnar, sem er nokkuð öruggt. Ég hefði samt sem áður skilað inn auðu ef ég hefði kosningaréttinn, einfaldlega til þess að lýsa óánægju minni yfir.

Fyrra álit

Elnino fyrir 19 árum, 10 mánuðum

Ég myndi skila auðu… eg er ekki alveg viss hvaða gaur eg myndi kjósa en það yrði örugglega baldur því að ástþor er vangefinn og Ólafur er hálfviti. hvers vegna ? af hverju gat ólafur ekki notað þetta neitunarvald þegar öryrkjamálið stóð sem hæst..? Ólafur er bara of politískur. þetta fjölmiðlafrumvarp gekk út á að eitt stórt fyrirtæki gæti ekki stjórnað eitt og sér fjölmiðlun íslands þannig að eg segi áfram baldu

Fyrra álit

Blitz fyrir 19 árum, 10 mánuðum

Allir á þessu heimili skiluðu auðu

Fyrra álit

Deiglan

Deiglan

Ofurhugar

Hverjir eru inni

Greinar

Forsetakosningar árið 2004

Dýr

Dægurmál

Fræði

Leikir

Lífið

Lífsstíll

Margmiðlun

Menning

Skjár

Sport

Tónlist

Tækni

Vélar

Hugi