Viðhald þarf ekki að vera meira á nýjum en gömlum. Einn vinur minn á nýlegann Volvo. Hann þarf að fara með hann í tjékk reglulega og borgar á fjórða tug þúsunda fyrir hvert skipti. Ég á gamla bíla og varahlutir hafa yfirleitt ekki náð þessari upphæð.

En hvað tryggingar og stærð bíla varðar þá er sá munur óverulegur. Ég borgaði 49 þúsund fyrir Suzuki Swift 1300 en 56 þús fyrir Blazer K5 átta gata á 38" dekkjum (voru báðir á skrá á sama tíma og gjöldin gíróseðlar sendir um leið fyrir báða).

Þegar ég keypti Blazerinn árið 1996 þá var einn félagi minn að kaupa ársgamlan Patról fyrir margfallda þá upphæð sem ég keypti Blazerinn á. Hann skildi ekkert í mér að kaupa gamlan amerískann bensínbíl, það væri svo dýrt að reka þetta. Ég staðgreiddi minn (650.000) meðan að hann tók sinn á lánum (2.700.000). Minn var breyttur en hans óbreyttur (og þurfti að leggja í töluverðan kostnað við að breyta honum).

Þegar upp var staðið þá fór meira í afskriftir hjá honum en fór í bensín hjá mér (og Blazerinn hefur verið mjög léttur í viðhaldi). Þá er eftir annar rekstrarkostnaður hjá honum eins og olía (og Patrol getur sopið), vaxtagjöld (lán eru ekki ókeypis) og svo hefur nú þurft að gera við ýmislegt í Datsuninum.

Samkvæmt útreikningum FÍB þá er viðhaldskostnaður á nýjum bíl um 80.000 á ári að meðaltali. Mínir gömlu bílar hafa ekki kostað mig svona mikið í viðhaldi.

Ég stend því fastar á því en fótunum að það er ekki hægt að réttlæta fjárfestingu í nýjum bíl með því að menn séu að spara, bíll er neysla en ekki fasteign!

JHG