Fornfrægir landskörungar nær og fjær
frá útkjálkasveitum sem enginn kannast við

voldugar fölbleikar skrifstofublókir spóka sig
á evuklæðunum minna á holtakjúklinga í Bónus

gráhærðir wesserbesserar sjóða sig í pottinum
kaupa sér vinsældir með kræsilegustu kjaftasögunum
tímunum saman uns þeir eru gegnumsoðnir
þá má nota þá í súpu með léttu meðlæti

útgengnar barnavélar reyna að koma sér í form
með nýjustu Speedo gleraugun hugsa sér gott til glóðarinnar

sundhettulið á inniskóm lætur eins og heima hjá sér
góna á mann eins og móðgaðar álftir á lítilli tjörn

í sturtunni sjampóa sumir gamlir karlar sig
svo kröftuglega ófeimið í klofinu að maður hlær upphátt
þá horfa allir alvarlega á mann og álíta mann skrýtinn