Ég var einmitt að spá í þessu sama. Ég er nýbyrjaður í Skákfélaginu Helli. Þeir eru reyndar bara með reglulegar æfingar fyrir litlu krakkana. Hins vegar eru mörg mót í gangi og best að fara á skak.is og smella þar á mótaáætlun S.Í. og þar er yfirlit yfir öll mót. Ég er sjálfur 25 ára og finnst vera lítið af fólki á mínum aldri sem kann svipað og ég en ég er óttalegur amatör. Flestir eru með 1600 stig og upp úr en ég hugsa að ég sé svona á bilinu 12-1400 ef ég næði inn á blað. Það er helst að maður geti veitt litlu krökkunum einhverja keppni en þeir slæðast af og til inn á þessi mót. En ég hef nú gríðarlega gaman að þessu þó maður sé alltaf með þeim neðstu. Svo æfir maður stíft á Netinu. Ég tefli á yahoo.com en er að spá í að skipta yfir í International Chess Club. Svo er maður að byrja að stúdera skákbækur og svo er maður að fara að kaupa sér Deep Fritz 8, öflugasta skákforrit allra tíma. Endilega látið sjá ykkur t.d. á Atkvöldi Hellis 1. des. Álfabakka 14. Það vantar fleiri amatöra á milli tvítugs og þrítugs finnst mér. Þeir virðast ekki þora að mæta á svona mót en það er engin spurning að þetta er miklu skemmtilegra en að húka heima teflandi við vini sína eða á Netinu.