Já, trúarbrögð og heimspeki eru tvennt ólíkt. Ég þarf ekki að skilgreina eða geta skilgreint heimspeki né trúarbrögð til að halda því fram. Trúarbrögð og vísindi eru líka tvennt ólíkt og ég þarf ekki að skilgreina eða geta skilgreint trúarbrögð eða vísindi til að halda því fram. Ég þarf ekki heldur að geta skilgrein list til að fullyrða að list er eitthvað allt annað en vísindi, heimspeki og trúarbrögð.

En án þess að ég ætli að freistast til að skilgreina þessi hugtök öll held ég að það megi segi að heimspeki sé fyrst og fremst viðleitni manna til að skilja grundvallarhugtök og það sem þau standa fyrir á röklegum grundvelli og í gegnum tiltekna rökræðu. Trúarbrögð vilja á hinn bóginn miklu frekar opinberast mönnum.

Auk þess virðist þetta tvennt ekki alltaf fjalla um sömu hlutina þótt stundum sé það vissulega svo. Trúarbrögð fjara út í hreina goðafræði í annan endann (að mínu mati er krstni t.a.m. ekki annað en upphafin goðafræði - ‘mýþólógía’ - af sama tagi og t.d. norræn goðafræði) en heimspeki rennur saman við vísindi á ákveðnum punktum; hún fjallar að verulegu leyti um hugtök sem notuð eru í vísindum en sem koma hvergi fyrir í skipulögðum trúarbrögðum. Einhvers staðar þarna á milli fjalla heimspeki og trúarbrögð vissulega um sömu hlutina að einhverju leyti en þó alveg bersýnilega ekki á sama hátt.

En hvers vegna var ég þá að skella upp tilkynningu? Jú vegna þess að um þær mundir er þessi tilkynning var sett inn höfðu verið sendar inn óvenju margar greinar um trúmál sem tengdust engan veginn heimspeki; t.d. bara greinar um stöðu Krossins eða Hvítasunnusafnaðarins í íslensku samfélagi (sem á frekar heima á Deiglunni) eða um söguna um syndaflóðið, eyðingu Sódómu eða að samkynhneigð sé viðurstyggð af því að það stendur í Gamla testamentinu. Svona greinar tengjast ekki heimspeki á neinn hátt. Það hefur ekkert með heimspeki að gera þótt einhverjum hafi opinberast meint eðli samkynhneigðar og að það standi núna í einhverri bók og hvort Nói smíðaði í raun og veru örk eða hvort sú saga hafi ekkert sagnfræðilegt gildi.