Þú færð vinnu við það sama og ef þú ert sagnfræðingur eða málvísindamaður, mannfræðingur eða stjórnmálafræðingur, íslenskufræðingur, fornfræðingur eða bókmenntafræðingur svo ég nefni nokkur dæmi. Öll þessi menntun er fyrst og fremst góð almenn menntun, þótt íslensk starfsmenntunarárátta viðurkenni það ekki alltaf.

Ég veit ekki betur en að seðlabankastjóri sé t.d. með háskólagráðu í sagnfræði og upplýsingafulltrúi Landsvirkjunar er heimspekingur, svo dæmi sé nú nefnt um heimspeking. Annar heimspekingur er prófstjóri Háskóla Íslands, einn er útgáfustjóri Háskólaútgáfunnar og enn einn er aðstoðarmaður rektors Háskóla Íslands.

Eins og fram kemur á vefsíðu Heimspekiskorar Háskóla Íslands hafa nemendur þaðan margir hverjir haldið út í framhaldsnám í heimspeki og ratað síðan í kennslu bæði á háskólastigi og einnig á grunn- og framhaldsskólastigi en þar að auki hafa sumir þeirra “náð árangri á sviðum hagfræði, lögfræði, bókmenntafræði, sagnfræði og stærðfræði”.

Margir hafa valist “í störf í mennta- og menningarstofnunum, fjölmiðlum, fyrirtækjum og stjórnmálum” og "[á] meðal útskrifaðra heimspekinga frá Háskóla Íslands má nefna alþingismenn, bæjarstjóra, stjórnarerindreka, þáttagerðamenn í sjónvarpi og útvarpi, blaðamenn, kynningarfulltrúa, textagerðarfólk, kennara, skáld og kvikmyndagerðarmenn".